ஆனந்த் சீனிவாசன் விளாசல்!

நாடு முழுவதும் பெரிதும் எதிர்பார்க்கப்பட்ட 2026-27 நிதியாண்டிற்கான மத்திய பட்ஜெட் தாக்கல் செய்யப்பட்டுவிட்டது. “அமுத காலம்”, “வளர்ச்சிப் பாதை” என அரசாங்கம் முழக்கமிட்டாலும், பொருளாதார நிபுணர் ஆனந்த் சீனிவாசன் அவர்களின் பார்வையில் இந்த பட்ஜெட் நடுத்தர வர்க்கத்தின் மீது விழுந்த இடி என்றே சொல்லலாம். தனது வழக்கமான அனல் பறக்கும் பாணியில், புல்லட் ரயில் முதல் பங்குச்சந்தை வரி வரை அவர் முன்வைக்கும் விமர்சனங்கள் ஒவ்வொன்றும் சாமானியனின் குமுறல்கள்.

1. புல்லட் ரயில் எங்கே? 15 ஆண்டு கால ஏமாற்றம்!

“மும்பை டு அகமதாபாத் புல்லட் ரயில் வரும்னு 15 வருஷமா சொல்லிட்டு இருக்காங்க. இன்னும் வந்தபாடில்லை. ஆனா இப்ப அடுத்த 15 வருஷத்துக்கு அதிவேக ரயில் பத்தி பேசுறாங்க. இதுல என்ன சாதனை இருக்கு?” என கேள்வியை எழுப்புகிறார் ஆனந்த் சீனிவாசன்.

காகிதத்தில் திட்டங்களை அறிவிப்பதில் இருக்கும் வேகம், களத்தில் செயல்படுத்துவதில் இல்லை என்பதே அவரது குற்றச்சாட்டு. உள்கட்டமைப்பு என்று சொல்லிவிட்டு, கடந்த நிதியாண்டை விட 5 சதவீதம் குறைவாகவே நிதி ஒதுக்கியிருப்பதை புள்ளிவிவரங்களுடன் சுட்டிக்காட்டுகிறார். “வட்டி கட்டுவதிலேயே நாட்டின் பாதி வருமானம் போகிறது, இதில் எங்கே வளர்ச்சி வரும்?” என்ற கேள்வி சிந்திக்க வைக்கிறது.

2. உண்மையான வளர்ச்சி வெறும் 4% தானா?

மத்திய நிதியமைச்சர் நிர்மலா சீதாராமன் முன்வைக்கும் கணக்குகள் ஒரு பக்கம் இருக்க, ஆனந்த் சீனிவாசன் முன்வைக்கும் கணக்கு வேறாக இருக்கிறது.

• அரசு சொல்லும் வளர்ச்சி : 8.2%
• ரிசர்வ் வங்கி சொல்லும் பணவீக்கம் : 4%
• கழித்துப் பார்த்தால் கிடைப்பது: வெறும் 4% வளர்ச்சி மட்டுமே!

“விலைவாசி உயர்வை மறைத்துவிட்டு, வளர்ச்சியை மட்டும் பெரிதாகக் காட்டுவது முழு பூசணிக்காயை சோற்றில் மறைப்பதற்கு சமம்” என கடுமையாகச் சாடுகிறார்.

3. பங்குச்சந்தைக்கு மரண அடி

இந்த பட்ஜெட்டில் முதலீட்டாளர்கள் தலையில் இடியை இறக்கியது STT  உயர்வுதான். “நீங்கள் லாபம் சம்பாதிக்கிறீர்களோ இல்லையோ, சூதாடுகிறீர்கள்… எங்களுக்கு வரியை கட்டிவிடுங்கள்” என்ற ரீதியில் அரசாங்கம் செயல்படுவதாக அவர் கூறுகிறார்.

“ஒரு கோடி ரூபாய்க்கு டிரேட் பண்ணா முன்னாடி 2000 ரூபா வரி. இப்ப அது 5000 ரூபா. F&O பக்கம் போனாலே காலி தான். இதனாலதான் Groww, Angel One பங்குகளெல்லாம் 10% சரிஞ்சு போச்சு.”

குறிப்பாக ITC பங்கு விலை வீழ்ச்சி, தங்கமயில் ஜுவல்லரி பங்கின் சரிவு என தனது “பட்டாசு லிஸ்ட்” பங்குகளே ஆட்டம் கண்டதை ஒளிவுமறைவின்றி ஒப்புக்கொள்கிறார். “நாளைக்கு இன்னும் விழும், அவசரப்பட்டு வாங்காதீங்க” என்ற எச்சரிக்கையும் விடுக்கிறார்.

4. வெள்ளி ஒரு ‘பேப்பர் வெயிட்’ – எச்சரிக்கை!

“வெள்ளி தான் புது தங்கம் ” என்று நம்பி ஏமாற வேண்டாம் என்கிறார். வெள்ளி விலை 4 லட்சத்தை தொடும் என்று எதிர்பார்த்த நிலையில், அது 2 லட்சத்து 80 ஆயிரத்திற்கு வந்துவிட்டது.

“வெள்ளி பக்கம் போகாதீங்கடான்னு கெஞ்சுறேன். அது சும்மா பேப்பர் வெயிட் மாதிரி ஆகிடும். ஜேபி மார்கன் சொன்னாங்கன்னு நம்பி வாங்கினீங்கன்னா ஷாக் அடிக்கும். இப்போதைக்கு அது இறங்குமுகத்துல தான் இருக்கு,” என அடித்துச் சொல்கிறார்.

5. பட்ஜெட் 2026: வெறும் காகிதமா?

இறுதியாக இந்த பட்ஜெட்டை பற்றி ஒற்றை வரியில் சொல்ல வேண்டுமென்றால்? ஒரு பழைய நகைச்சுவை காட்சியை நினைவுபடுத்துகிறார். “பேப்பரை படிச்சு பாருன்னு கொடுப்பாங்க.. படிச்சா அதுல ஒண்ணுமே இருக்காது.. கிழிச்சு போட்ருன்னு சொல்லுவாங்க.. அதுதான் இந்த பட்ஜெட்.”

2047-ல் வளர்ந்த இந்தியா என்கிறார்கள். ஆனால் 2026-ல் வாழும் மக்களுக்கு இந்த பட்ஜெட்டில் என்ன இருக்கிறது? வருமான வரிச் சலுகை இல்லை, ஜிஎஸ்டி குறைப்பு இல்லை. கார்ப்பரேட் நிறுவனங்களுக்கான சலுகைகள் மட்டுமே உள்ளன. நடுத்தர வர்க்கம் கையை பிசைந்து கொண்டு நிற்க வேண்டியதுதான்.